ஏமாற்றுவதும் ஒரு கலைதான்! 16

ரூபாய் இரண்டு இலட்சத்தை யாரையும் கலந்து ஆலோசிக்காமல் தொலைபேசியில் வங்கித் தலைவர் குரலில் பேசியவர் 
சொன்னதின் பேரில் விதிகளுக்கு புறம்பாக பணத்தை கொடுத்த 
அலுவலர் தான் ஏமாந்துவிட்டோம் எனத் தெரிந்ததும் 
என்ன செய்வதென்று புரியாமல் விழித்திருக்கிறார்.

அவர் மட்டுமல்ல அவரோடு சேர்ந்து அந்த பணத்தை எடுத்து 

செல்ல பற்று சீட்டு தயார் செய்த அலுவலரும் அவசரப்பட்டு 

நாமும் மாட்டிக்கொண்டோமே என்று கவலைப்பட்டிருக்கிறார்.

வங்கிகளின் விதிப்படி அன்றைய கணக்கு முடித்து வரவு செலவு பார்க்கும்போது  கணக்கு புத்தகத்தின்படி வங்கிக்கு செலுத்தப்பட்ட தொகையும் விதிமுறைப்படி கொடுக்கப்பட்ட பணத்தையும் 

கணக்கில் எடுத்துக் கொள்ளும்போது  வரும் கையிருப்புத்

தொகையும் வங்கியில் உள்ள தொகையும் சரியாக (Tally) இருக்கவேண்டும்.   

அந்த இரண்டு இலட்சம் ரூபாய்களும் விதிகளுக்கு உட்பட்டு 

தராததால் நிச்சயம் அவை இருப்பில் குறைவதாகவே 

கணக்கிடப்பட்டு அதற்கு காரணமான அந்த இரு அலுவலர்கள் 

மீது துறை ரீதியான நடவடிக்கை எடுக்கப்படும் என்பதால் 

இருவருமே பயந்திருக்கிறார்கள்.

அந்த வங்கியில் ரூபாய் பத்தாயிரமும் அதற்கு மேலும் கணக்கில் குறைந்தால் முதலில் பணி இடை நீக்கம் (Suspension) செய்துவிட்டு 

பின்னர் குற்ற அறிக்கை (Charge Sheet) தந்து மேல் நடவடிக்கை 

எடுப்பது வழக்கம். எல்லா வங்கியிலும் பணம் குறைந்தால் 

இது போன்ற நடவடிக்கை தான் எடுப்பார்கள்.

அவர்கள் இருவரும் உடனே அவர்கள்  சார்ந்திருந்த அலுவலர் 

சங்கத்தை தொடர்பு கொண்டபோது, ‘உடனே அந்த பணத்தை 

கட்டுங்கள் அப்போதுதான் பணி இடை நீக்கம் இல்லாமல் 

தப்பிக்கலாம்.’ என அறிவுறுத்தியிருக்கிறார்கள் சங்க நிர்வாகிகள்.

அந்த இரு அலுவலர்களும் உடனே தங்களோடு பணிபுரிந்த 

நண்பர்கள் மற்றும் தெரிந்தவர்களிடம் கடன் வாங்கி அன்று 

மாலைக்குள் அந்த பணத்தைக் கட்டி பணி இடை நீக்கம் 

ஆகாமல் தப்பித்துக்கொண்டது வேறு கதை.

இந்த இடத்தில் ஒன்றை கவனிக்கவேண்டும். அவர்களை 

ஏமாற்றிய அந்த நபர் நமது அலுவலகங்களின் இருக்கும் 

நடைமுறையை அறிந்து சுலபமாக வெறும் வாயையும் 

புத்தியையும் மூலதனமாகக் கொண்டு சில மணித்துணிகளில் 

இரண்டு இலட்ச ரூபாய்களை ‘சம்பாதித்து’விட்டார்.

ஆனால் வங்கியில் விழிப்போடு இருக்கவேண்டிய 

அலுவலர்கள் இருவரும் தங்களது மேல் அலுவலர் பேசுகிறார் 

என்றதும் சிறிது கூட யோசிக்காமல் பணத்தை கொடுத்து 

அதை இழந்துவிட்டார்கள்.

அதற்கு காரணம் நம் நாட்டு அலுவலகங்களில் பணிபுரிவோரில் பெரும்பான்மையோர் தமது மேலதிகாரிகளின் செல்லப்பிள்ளைகளாக 

(in their good books) இருந்தால்தான் சலுகைகளும் பதவி உயர்வு பெறமுடியும் என்று அலுவலக வேலை மட்டுமல்லாமல், தங்களது

மேல் அலுவலர்களின் தனிப்பட்ட வேலையையும் செய்து கொடுப்பது போன்ற நடைமுறையை அவர்கள் பின்பற்றியதுதான்.

இந்த பலகீனத்தை அறிந்ததால்தான்  அந்த நபர் வெகு 

சுலபமாக அநேகம் பேரை ஏமாற்றியிருக்கிறார். ஆனால் 

எனக்கு இன்றளவும் ஒரு ஐயம் மனதில் உண்டு. அது 

என்னவென்றால் அவருக்கு பல மொழிகள் தெரிந்திருக்கலாம்.

அவர் பல குரலில் பேசும் கலையை கற்றிருக்கலாம். அதனால் 

அவரால் ஒரு அரசியல் தலைவர் போலவோ அல்லது ஒரு

திரைப்பட நடிகர் போலவோ எளிதாக பேசமுடியும். ஏனெனில்

அவர்களின் பேச்சை அரசியல் கூட்டங்களிலோ அல்லது திரைப்படங்களிலோ கேட்டு அதுபோல் பேசி பழக வாய்ப்புண்டு. 

ஆனால் நாட்டுடமையாக்கப்பட்ட ஒரு வங்கியின் தலைவர் 

குரலையோ அல்லது அரசு செயலரின் குரலையோ அவர் எங்கு கேட்டிருக்கமுடியும் என்பதே அது.

எது எப்படியோ உண்மையில் அவர் ஒரு பல குரல் மன்னன் 

என்பதிலோ அதி புத்திசாலி என்பதிலோ இரு வேறு கருத்துக்கள் 

இருக்க முடியாது. 

 

இதுபோன்று ஏமாற்றுப் பேர்வழி வங்கியாளர்களையோ அரசு 

ஊழியர்களையோ 90 களில் ஏமாற்றியது ஒன்றும் நமக்கு புதிதல்ல. 

ஏனெனில் இவர் இவ்வாறு செய்யு முன்பே, 1971 ஆம் ஆண்டு 

புது தில்லியில் வேறொருவர் இதைவிட மிகவும் துணிச்சலாக செய்த 

காரியம் பல நாட்கள் பரபரப்பாக பேசப்பட்டது. 

 

அது என்ன தெரியுமா?

 

தொடரும்

 

அனைவருக்கும் உளம் கனிந்த தீபாவளித் திருநாள்  வாழ்த்துக்கள்!