மறக்கமுடியாத பொன்விழா சந்திப்பு! 38

மறுநாள் காலை நாங்கள் பயணித்த ‘மன்னை’ விரைவு இரயில் 13-09-2016 அன்று அதிகாலை 5.10 க்கு மாம்பலம் இரயில் நிலையம் அடைந்ததும், நண்பர் சேதுராமன் எங்களிடம் விடைபெற்று இறங்கிக்கொண்டார். நாங்கள் எழும்பூர் இரயில் நிலையம் அடைந்தபோது காலை மணி 5.50.




முதல் நாள் இரவு தஞ்சையிலிருந்து புறப்படுமுன்பே Fast Track நிறுவனத்திடம் மறு நாள் காலை சுமார் 6 மணிக்கு சென்னை எழும்பூர் இரயில் நிலைத்திலிருந்து அண்ணா நகர் செல்ல மகிழுந்து வேண்டும் என சொல்லியிருந்தேன். அவர்களும் எனது வேண்டுகோளை ஏற்று காலையில் நான் குறிப்பிட்டிருந்த நேரத்திற்கு வாகனத்தை அனுப்புவதாக சொல்லியிருந்தார்கள்.

அது போல காலையில் அந்த நிறுவனம் எனக்கு வரும் வாகனத்தின் எண் மற்றும் வாகன ஓட்டியின் பெயர், மற்றும் அவரது கைப்பேசி எண் ஆகியவைகளை குறுஞ்செய்தியாக அனுப்பியிருந்தது.

நாங்கள் இரயிலிலிருந்து இறங்கியதும், அந்த ஓட்டுனரை கூப்பிட்டு நாங்கள் வந்துவிட்டோம் என்றும், அவர் எங்கிருக்கிறார் என்றும் கேட்டேன். அதற்கு அவர் தான் பெரியமேட்டில் இருப்பதாகவும், இரயில் நிலையத்திற்கு வந்துகொண்டு இருப்பதாகவும் சொன்னார்.

பெரியமேடு, எழும்பூர் இரயில் நிலையத்திற்கு வெகு அருகில் இருப்பதால் அவர் விரைவில் வந்து வருவார் எனக் காத்திருந்தோம். கால் மணி ஆகியும் அவர் வராததால், அவரை தொடர்பு கொண்டபோது, அவர் ‘இதோ வந்துகொண்டு இருக்கிறேன்’ என்று சொன்னாரே ஒழிய, தான் எங்கிருக்கிறேன் என்பதை சொல்லவில்லை. அரை மணி ஆனபிறகும் வராததால் நேரே Fast Track நிறுவனத்தை தொடர்புகொண்டு விவரத்தை சொன்னபோது, அவர்கள் வேறு வாகனம் ஏற்பாடு செய்வதாக சொன்னார்களே தவிர, ஏன் முன்பு சொன்ன வாகனம் வரவில்லை என்பதை சொல்லவில்லை.

அதற்குள் காலை மணி 6.40 ஆகிவிட்டது.மேலும் இரயில் நிலைய நடைமேடையில், அந்த இரயிலிலிருந்து இறங்கிய எங்களைத்தவிர மற்றவர்கள் வெளியே போய்விட்டனர். இனி Fast Track ஐ நம்பி பயனில்லை என்பதால் வாகனம் வேண்டாம் என சொல்லிவிட்டு ஒரு தானி யில் ஏறி வீடு வந்து சேர்ந்தோம். இந்த Call Taxi ஓட்டுனர்களில் சிலர் (அதுவும் Fast Track நிறுவனத்தோடு இணைந்துள்ளவர்கள்) காலை வேளையில் சொன்னால் வருவதில்லை. எனக்கு பலமுறை இந்த அனுபவம் ஏற்பட்டிருக்கிறது.

நாங்கள் சென்னைக்கு வந்து இரண்டு நாட்களுக்குப் பிறகு நண்பர் பாலு பொன் விழா சந்திப்பில் முதல் நாள் காலை எடுத்திருந்த புகைப்படங்களில் சிலவற்றை மின்னஞ்சல் மூலம் அனுப்பியிருந்தார். பின்னர் அன்று காலை எடுத்த அனைத்து படங்களையும் குறுந்தகட்டில் அனுப்பிவிட்டார்.

பின்னர் இந்த ஆண்டு சனவரி 3 ஆம் நாள் அவரும் முருகானந்தமும் சேர்ந்து அனுப்பிய புத்தாண்டு வாழ்த்துகளோடு, பொன் விழா சந்திப்பில் கலந்துகொண்ட நண்பர்கள் அனைவருக்கும் நன்றி தெரிவித்ததோடல்லாமல், அந்த விழா சிறப்பாக நடைபெற உதவிய அனைவரையும் பெயர் குறிப்பிட்டு தஞ்சை நண்பர்கள் சார்பில் நன்றி தெரிவித்திருந்தார்.

மேலும் நண்பர்கள் ஒவ்வொருவரும் அளித்த பங்குத் தொகையான ரூபாய் 6000 த்தோடு அவர்கள் அளித்த மேலதிகத்தொகையையும் குறிப்பிட்டு, முந்தைய சந்திப்பில் செலவழிந்தது போக மீதி இருந்த தொகை மற்றும் அதற்கான வட்டி மொத்தம் ரூபாய் 21,500 என்றும் அவைகளையும் சேர்த்து இந்த விழாவிற்கு சேர்ந்த தொகை ரூபாய் 4,67,753 என்றும் தெரிவித்திருந்தார்.

அதோடு தஞ்சை நண்பர்கள் முருகனாந்தம், பாலசுப்பிரமணியன், நாகராஜன், சரவணன், பெத்தபெருமாள், ஜனார்த்தனன் ஆகியோர் பெயரில் அனுப்பியிருந்த விரிவான கணக்கு விவர அறிக்கையில், விழாவில் செலவு செய்யப்பட்ட தொகைகள், எதற்காக செலவிடப்பட்டன என்பதை வகைப்படுத்தி, மொத்த செலவு ரூபாய் 3,76,622 ஆயிற்று என்றும் மீதி ரூபாய் 91131 இருப்பதாகவும், அதை நண்பர்கள் அனுமதித்தால் கோவையில் 2018 ஆம் ஆண்டு நடக்க இருக்கும் சந்திப்புக்கு பயன்படுத்திக் கொள்ளலாம் என்றும், அது பற்றி எல்லோருடைய கருத்துக்களையும் கேட்டிருந்தார்கள்.

(நாங்கள் எல்லோரும் அந்த கருத்தை ஆமோதித்ததால் அந்த தொகை வங்கியில் வைப்புத்தொகையாக வைக்கப்பட்டுள்ளது.)

மேலும் எங்களது சந்திப்பு பற்றி நாளேடுகளில் வந்திருந்த செய்திகளையும் அனுப்பியிருந்தார் நண்பர் பாலு.

நாளேடுகளில் வந்த செய்திகள்

நண்பர் பாலுவுக்கு நான் நன்றி தெரிவித்து அனுப்பிய மின்னஞ்சலில், தஞ்சை நண்பர்களின் ஒப்புவமையற்ற சீரிய பணிக்கு நன்றி தெரிவிப்பதைத் தவிர சொல்ல வேறொன்றுமில்லை எனக் குறிப்பிட்டிருந்தேன்.

நண்பர் அய்யம்பெருமாள் கனடா சென்ற பிறகு 2016 ஆம் ஆண்டு டிசம்பர் திங்களில் எங்கள் அனைவருக்கும் அனுப்பிய அஞ்சலில் 2017 ஆம் ஆண்டு ஜூன்/ஜூலை/ஆகஸ்ட் மாதங்களில் கனடாவில் மேற்கொள்ள இருக்கும் 10 நாட்கள் பயணத்திற்கான பயண நிரல் (Itinerary) அனுப்பியிருந்தார்.

பின்னர் இந்த ஆண்டு மார்ச் மாதத்தில் திருத்தப்பட்ட பயண நிரலை அனுப்பியிருந்தார். அதில் நயாக்ரா அருவி (நீர் வீழ்ச்சி என்பது சரியான சொல் ஆளுகை அல்ல என்பதால் அருவி என்று குறிப்பிட்டிருக்கிறேன்.), டொராண்டோ (Toronto), ஒட்டாவா (Ottawa), மொண்ட்ரியால் (Montreal), கியூபெக் (Quebec) ஆகிய இடங்களுக்கு செல்வது பற்றி விரிவாக எழுதியிருந்தார்,

அந்த பயணத்திற்காக பயண முகவர் (Travel Agent) ஒருவரை அணுகியபோது, அவர் சொன்ன இடங்கள் மற்றும் நாட்கள் குறைவாக இருந்ததால் நண்பர் அய்யம்பெருமாள் உதவியுடன் நாங்களே பயண ஏற்பாட்டை செய்வதென முடிவு செய்தோம். நாட்கள் நெருங்கிவிட்டதால் அந்த பயணத்தை 2018 ஆம் ஆண்டிற்கு தள்ளிப்போட்டுவிட்டோம்.

எங்களை கல்லூரி நாட்களுக்கு அழைத்துச் சென்று ,மனதளவில் இளமையாக்கி, எங்களுக்கு உற்சாகமூட்டிய, தஞ்சை பொன்விழா சந்திப்பின் நிகழ்வுகளை, மகிழ்ச்சியுடன் மனதில் அசை போட்டுக்கொண்டு, அடுத்த ஆண்டு நடக்க இருக்கும் கோவை சந்திப்பிற்காக ஆவலுடன் காத்திருக்கிறேன்.


பின் குறிப்பு: எங்களது பொன் விழா சந்திப்பு கடந்த ஆண்டு இதே நாளில் நிறைவுற்றது. இந்த தொடர் பதிவும் அதே நாளில் ஓராண்டு கழித்து நிறைவுபெறுவது தற்செயலாக நடந்தது அல்ல!