மொழிபெயர்ப்புக் க(கொ)லை! 1

ஒரு மொழியிலிருந்து இன்னொரு மொழிக்கு மாற்றம் செய்வதை மொழி பெயர்ப்பு (Translation) என்கிறோம். அது வேற்று மொழியில் உள்ள நூல்களை இன்னொரு மொழியில் மாற்றம் செய்வதாய் இருக்கலாம் அல்லது வேற்று மொழியில் ஒருவர் மேடையில் பேசும் பேச்சை, அம்மொழி அறியாத மக்களுக்காக அவர்கள் மொழியில் மாற்றம் செய்வதாக கூட இருக்கலாம்.    

ஆனால் அந்நியர்கள் நம்மை ஆண்டபோது அவர்கள் பேசுவதை நமது மொழியில்  சொல்லவும், நம் மக்கள் சொல்வதை அவர்கள் மொழியில் சொல்லவும் உரை பெயர்ப்பாளர்கள் (Interpreters) பணியில் சிலர்  இருந்தார்கள். அவர்களை ‘துபாஷி’ (இரு மொழி அறிந்தோர்) என சொல்வார்கள். 

(இந்த உரை பெயர்ப்பாளர்களில் மிகவும் பிரபலமானவர் புதுவையில் இருந்த துபாஷி ஆனந்தரங்கம் பிள்ளை என்பவர்.இவர் புதுவை ஆளுநராக இருந்த ஜோசப் ஃப்ரான்கோய்ஸ் தூப்ளே (Joseph-François, Marquis Dupleix) என்பவருக்கு உரை பெயர்ப்பாளராக இருந்தவர். இவர் எழுதிய நாட்குறிப்பு ஆனந்தரங்கம் பிள்ளை நாட்குறிப்பு என அழைக்கப்படுகிறது. இது ஒரு வரலாற்று ஆவணமாக கருதப்படுகிறது.)

உரை பெயர்ப்பாளர்களானாலும், மொழிபெயர்ப்போர்களானாலும்  

தாங்கள் மொழிபெயர்க்கும் மொழியையும், தங்களது மொழியையும் நன்றாக அறிந்தாலோழிய தங்கள் பணியை திறம்பட செய்ய இயலாது என்பது தெரிந்ததே. 

மொழிபெயர்ப்பதில் மேடைப்பேச்சை மொழிபெயர்ப்பது என்பது, வேற்று மொழியில் எழுதியதை மொழிபெயர்ப்பதைவிட சற்று கடினம். காரணம் இரண்டுக்கும் அதிக வேறுபாடு உண்டு. 

எழுத்தை மொழிபெயர்ப்பவர் எழுத்துதிறமை கொண்டவராகவும்  மூலக்கருத்தை உள்வாங்கி அதை சிதைக்காமல், தான் மொழிபெயர்க்கும் மொழியில் அதை சிறப்பாக வெளிப்படுத்தும் திறமை கொண்டவராக இருக்கவேண்டும். இத்தகைய மொழிபெயர்ப்பாளர்களுக்கு ஒரு சாதகம் (Advantage) உண்டு.

இவர்கள் குறிப்பிட்ட நேரத்திற்குள் மொழிபெயர்க்கவேண்டும் என்ற கட்டாயம் இல்லை..மேலும் இவர்களுக்கு ஒரு சொல்லில் அல்லது பொருளில் ஐயம் ஏற்படின் சொற்களஞ்சியத்தை (Dictionary) பார்த்தோ அல்லது நண்பர்களை கேட்டோ ஐயத்தை தெளிவுபடுத்திக்கொண்டு பணியைத் தொடரலாம். தற்போது கூகிளாரின் (Google) உதவியையும் நாடலாம். 

ஆனால் இதிலும் ஒரு சிக்கல் உள்ளது. மொழிபெயர்க்கும் நூல் அறிவியல் நூலாகவோ அல்லது கலை இலக்கிய நூலாகவோ இருப்பின் இருமொழித் திறமையோடு  அந்த துறையில் தேர்ச்சி பெற்றவராக இல்லாவிடில் மொழிபெயர்ப்பு என்பது வெறும் சொற்களை மட்டும் மாற்றம் செய்த பொருளற்ற (Meaningless) மொழிபெயர்ப்பாக  ஆகிவிடும்.  

அதுவும் பாட நூல்களை மொழிபெயர்ப்போர் அவசியம் அந்த பாடம் பற்றி அறிந்தவராக இருக்கவேண்டும். எடுத்துக்காட்டாக ஒரு அறிவியல் நூலை ஆங்கிலத்திலிருந்தோ அல்லது பிற மொழிலிருந்தோ தமிழில் மொழிபெயர்ப்பவர் தமிழ் மொழியில் புலமை உள்ள அறிவியலாராக இருப்பின் அந்த மொழிபெயர்ப்பு, அந்த பாடத்தை தமிழில் படிக்கும் மாணவர்களுக்கு பயனுள்ளதாக இருக்கும். 

70 களில் அரசு பாட நூல்களை தமிழில் மொழிமாற்றம் செய்து வெளியிட்டபோது பொருளாதார பாடத்தில் தமிழில் குறிப்பிட்டிருந்த ஒரு சொல்லுக்கு பொருளாதார ஆசிரியருக்கே அதனுடைய பொருள் விளங்கவில்லை. 

‘விலைவாசியைக் குறைக்க அரசிடம் விளயாட ஒரு பெரிய உருளை உள்ளது!' என்பதே அது. 

இதனுடைய் ஆங்கில மூலம் என்னவாக இருக்கும் என்று  யூகிக்கமுடிக்கிறதா? தெரிந்தவர்கள் பின்னூட்டத்தில் வெளியிடலாம். அந்த சொல் என்ன என்பதை  அடுத்த பதிவில் சொல்கிறேன். 

தொடரும்.