தொடரும் சந்திப்பு 25

காலை நிகழ்ச்சிகள் முடிந்த பிறகு அனைவரும்  குழுவாக புகைப்படம் எடுத்துக்கொள்ள குடில்களுக்கும் தென்னந் தோப்புகளுக்கும் இடையே  அமைந்திருந்த அடுக்கு இருக்கை கொண்ட வட்டரங்கத்திற்கு (Amphitheatre) சென்றோம்.

அங்கே முதலில் நண்பர்கள் மட்டும் தனியாக புகைப்படம் எடுத்துக்கொண்டு பின்னர் சந்திப்பிற்கு வந்திருந்த குடும்பத்தினருடனும்  புகைப்படம் எடுத்துக்கொண்டோம். 

புகைப்படம் எடுத்து முடிந்தவுடன் மதிய உணவை சாப்பிட திரும்ப அரங்கிற்கே வந்தோம். அங்கே எடுத்தூண் முறையில் ஏற்பாடு செய்யப்பட்டிருந்த மதிய உணவில்,  வடிசாறு (Soup), காய்கறிக் கலவை (Salad), பழக்கலவை (Fruit Chat), மொரமொரப்பான பொறித்த காய்கறி (Crispy Fried Vegetable), வெண்ணெயுடன் பாலடைக்கட்டி (Panneer Makhani), வெள்ளைப் பூண்டுடன் பருப்பு (Dal Lasooni), சாதா ரொட்டி, வெண்ணெய் ரொட்டி, காய்கறி நூலடை (Vegetable Hakka Noodles) காரைக்குடி பிரியாணி, எண்ணை கத்தரிக்காய், சுடச்சுட சோறு, எலுமிச்சை ரசம், தயிர், அப்பளம், ஊறுகாய், வடகம், மோர் மிளகாய், தயிர் பச்சடி, அடைப் பிரதமன், பனிக்கூழ் (Ice Cream), Fruit Trifle மற்றும் அசைவப் பிரியர்களுக்காக  கோழிக் கறி, மீன் மஞ்சூரியன், போன்றவைகளை வைத்திருந்தார்கள்.

அனைவரும் அவரவர்களுக்கு பிடித்ததை  எடுத்துக்கொண்டு நண்பர்களுடன் பேசிக்கொண்டே சாப்பிட்டோம். 

மதியம்  இரண்டு மணிக்கு அங்கிருந்து புறப்படவேண்டும் என்று திட்டமிட்டிருந்தாலும் எல்லோரும் புறப்படும்போது மதியம் 2.30 மணி ஆகிவிட்டது. 

எல்லோரையும் ஒன்றாக அழைத்து செல்ல திட்டமிருந்ததால் இந்த முறை கூடுந்து (Van) ஏற்பாடு செய்யாமல் பேருந்து ஒன்றை ஏற்பாடு செய்திருந்தார்கள் கோவை நண்பர்கள். 

அந்த ஓய்வகத்தை பிரிய மனமில்லாமல் எல்லோரும் அங்கிருந்து 10 கி.மீ தொலைவில் ஆனைமலை என்ற ஊரில்இருக்கும் மாசாணி அம்மன் கோவிலை நோக்கி புறப்பட்டோம். 

தொடரும்