நினைவோட்டம் 77

அடுத்து நான் மறக்க இயலா ஆசிரியர் தர்க்கவியல் (Logic) பாடம் நடத்தியவர்.

அவர் பெயரும் பெர்னாண்டஸ் தான். ஆனால்  திரு பெர்னாண்டஸ் தமிழ் நாட்டை சேர்ந்தவர்.

அவர்தான் எங்களுக்கு பாடம் நடத்தியவர்களில் இளையவர். அதனால் அவர் எங்களுக்கு ஆசிரியர் போல் தெரியவில்லை. ஏதோ Senior மாணவர் வந்து பாடம் நடத்தியது போல் இருந்ததால் அவரது வகுப்பில் நாங்கள் சௌகரியமாக இருப்பதைப் போல் உணர்ந்தோம். அவர் எப்போதும் சிரித்த முகத்தோடு தான்  பாடம் நடத்துவார்.   

இப்போது நினைத்துப் பார்க்கும்போது அவருக்கு இரண்டு விதமான பொறுப்புகள் அப்போது இருந்திருக்கும் என எண்ணுகிறேன். ஒன்று தர்க்கவியல் என்றால் என்னவென்று தெரியாத, அதுவரை அறிந்திராத எங்களுக்கு அதை சொல்லித் தரவேண்டும். இரண்டாவது அதை நாங்கள் புரிந்துகொள்ளும் அளவிற்கு அதை ஆங்கிலத்தில் சொல்லித்தரவேண்டும்!

இதை  ஏன் சொல்கிறேன் என்றால், மற்ற பாடங்களான இயற்பியல், வேதியல், தாவரவியல் விலங்கியல் போன்றவைகளை பள்ளியிலேயே படித்திருந்ததால் அவைகளை ஆங்கிலத்தில் நடத்தும்போது புரிய வாய்ப்புண்டு. அப்படி புரியாதபோது தாவரவியல் ஆசிரியர் சொன்னதுபோல் பாடத்தின் தலைப்பை சொன்னாலே புரிந்துகொண்டிருப்போம்.

காரண காரணங்களை தீவிரமாக ஆய்வதைத்தான் (Systematic study of the principles of good reasoning) Logic என்பார்கள். ஆனால் இந்த பாடமே எங்களுக்கு புதியது என்பதால் அவர் மிகுந்த சிரத்தையோடு சொல்லிக் கொடுத்ததால் ஓரிரு மாதங்களிலேயே படத்தைப் புரிந்து கொண்டுவிட்டோம்.

அவர் சொல்லிக் கொடுத்ததில் நான் இன்னும் மறக்காமல் இருப்பது ‘தவறான வாதம்’ (Fallacy) பற்றி  சொன்ன எடுத்துக்காட்டு.

God is Love

Love is blind

So God is blind

அதுபோல இன்னொரு எடுத்துக்காட்டும் நினைவில் நிற்கிறது

Half door opened is equal to Half Door closed

So Full door opened is equal to Full Door closed

இந்த பாடத்தில் எனக்கு அதிக நாட்டம் ஏற்பட்டது இதுபோன்ற குதர்க்கமான வாதங்களாலா அல்லது சுவாரஸ்யமாக பாடம் நடத்திய ஆசிரியராலா எனத்  தெரியவில்லை. அதிக ஈர்ப்பு இருந்தததால் தான்  தர்க்கவியல் பாடத்தில் இறுதித்தேர்வில் என்னால் A Plus மதிப்பெண்கள் பெறமுடிந்தது என நினைக்கிறேன். (A Plus என்றால் 65 விழுக்காடு முதல் 74 விழுக்காடு வரை)

  

அப்போதெல்லாம் தேர்வு எழுதுவோருக்கு மதிப்பெண்கள் தருவதில்லை. அதற்கு பதில், பெற்ற மதிப்பெண்களை தர வரிசைப்படுத்தி (Grade) அதை A Plus இல் ஆரம்பித்து F வரை குறியீடாகத்தான் தருவார்கள் என்று நினைவோட்டம் 74 இல் எழுதியிருந்தேன்.அந்த வரிசைப்பற்றிய விவரத்தை பின்னர் எழுதுவேன் என சொல்லியிருந்தேன். அதன் விவரம் கீழே தந்துள்ளேன்.

A Plus என்றால் 65 விழுக்காடும் அதற்குமேலும் ஆனால் 75 விழுக்காடுக்கு கீழேயும்  

A என்றால் 60 விழுக்காடும் அதற்கு மேலும் ஆனால் 65 விழுக்காடுக்கு கீழேயும்

B Plus என்றால் 55 விழுக்காடும் அதற்கு மேலும் ஆனால் 60 விழுக்காடுக்கு கீழேயும்

B என்றால் 50 விழுக்காடும் அதற்கு மேலும் ஆனால் 55 விழுக்காடுக்கு கீழேயும்

C Plus என்றால் 45 விழுக்காடும் அதற்கு மேலும் ஆனால் 50 விழுக்காடுக்கு கீழேயும்

C என்றால் மொழிப்பாடங்களுக்கு 40 விழுக்காடும் அதற்கு மேலும் ஆனால் 45  விழுக்காடுக்கு கீழேயும் மற்ற பாடங்களுக்கு 35 விழுக்காடும் அதற்கு மேலும் ஆனால் 45  விழுக்காடுக்கு கீழேயும்

D Plus என்றால் (Special Distinction) 85 விழுக்காடும் அதற்கு மேலும் ஆனால் 100 விழுக்காடுக்கு கீழேயும்

D என்றால் (Distinction) 75 விழுக்காடும் அதற்கு மேலும் ஆனால் 85 விழுக்காடுக்கு கீழேயும் (தேர்வில் எல்லா பாடங்களிலும் ஒரே தடவையில் வெற்றிபெறும்போது)

D* என்றால் 75 விழுக்காடும் அதற்கு மேலும் ஆனால் 85 விழுக்காடுக்கு கீழேயும் (தேர்வை ஒரு தடவைக்குமேல் எழுதி வெற்றி பெற்றோருக்கு)

H என்றால் (Special Distinction) 100 விழுக்காடு மதிப்பெண்கள்

F என்றால் தோல்வி

அவரிடம் எந்த அளவுக்கு சுதந்திரமாக இருந்தோம் என்றால் ஒருநாள் அவர் பாடம் நடத்திவிட்டு ‘சந்தேகம் ஏதேனும் உண்டா?’ எனக் கேட்டபோது ஒரு மாணவன் எழுந்து ’சார். பாடத்தில் சந்தேகம் இல்லை. வேறொரு சந்தேகம் உண்டு. கேட்கலாமா?; என்றபோது, அவர் ‘பாடத்தில் சந்தேகம்  இல்லை என்பதைக் கேட்க மகிழ்ச்சியாய் இருக்கிறது. வேறென்ன சந்தேகம். கேள்.’ என்றார்.

உடனே அவன் ‘திமுகவிலிருந்து E.V.K சம்பத் ஏன் வெளியேறினார்?’ என்று கேட்டபோது வகுப்பில் ஒரே சிரிப்பு தான். அவர் அதற்கு ‘சிரித்துக்கொண்டே அரசியல் பற்றி தெரிந்துகொள்ளலாம். ஆனால் அதில் ஈடுபடும் வயது உங்களுக்கு இதுவல்ல.’ எனக் கூறிவிட்டு பின் திரு சம்பத் வெளியேறியது பற்றி சொன்னார்.

மிகவும் கண்டிப்புக்குப் பெயர் போன எங்கள் கல்லூரியில் இதுபோன்று மாணவர்களோடு நெருங்கிப் பழகி, பேசி பாடம் நடத்தியவர்களும் உண்டு.

நினைவுகள் தொடரும்  

வே.நடனசபாபதி