குமுதமும் விகடனும் – சிறுகதைத் தொகுப்பு 1 – நூல் ஆய்வு

மூத்த வலைப்பதிவர் திரு வை கோபாலகிருஷ்ணன் அவர்கள் 30-03-2017 அன்று ‘மின்னல் வேகத்தில் மின்னூல்கள்’ என்ற தலைப்பில் வெளியிட்டிருந்த பதிவில் மின்னூல்கள் (e-books) பற்றி குறிப்பிட்டு, அவருடைய 10 படைப்புகள் குறுகிய காலத்தில் மின்னூல்களாக வெளிவந்திருப்பதாக எழுதியிருந்தார். சகோதரி திருமதி கலையரசி அவர்களுடைய படைப்புகளும் மின்னூல் வடிவில் வந்திருப்பதாக எழுதியிருந்தார்.


அதைப் படித்தபிறகு மின்னூல் பற்றி மேலும் அறிய ஆவல் எழுந்தது. ஆனால் அந்த நூல்களை வாங்கிப் படிப்பது குறித்து எந்த முயற்சியும் மேற்கொள்ளவில்லை. ஆனால் மின்னூல் பற்றிய மேல் விவரங்களை அறிந்துகொள்ளும் வாய்ப்பு, 20-4-2017 அன்று சென்னை வந்திருந்த மூத்த பதிவர் திரு G.M.பாலசுப்ரமணியம் அவர்களின் அழைப்பின் பேரில் அவரை சந்திக்க வேளச்சேரி சென்றபோது எழுத்தாளரும் பூவனம் வலைத்தள பதிவருமான திரு ஜீவி அவர்கள் மூலம் கிட்டியது.

திரு ஜீவி அவர்கள்

அதுவரை நான் திரு ஜீவி அவர்களை நேரில் சந்தித்ததில்லை. ஆனால் திரு வை.கோபாலகிருஷ்ணன் அவர்கள் 14-03-2016 இல் திரு ஜீவி அவர்களின் ‘ந.பிச்சமூர்த்தியிலிருந்து எஸ். ரா. வரை’ என்ற நூலை திறனாய்வு செய்து வெளியிட்டதை படித்தபோது தான் எழுத்தாளர் திரு ஜீவி அவர்கள் பற்றி அறிந்துகொண்டேன். பின்னர் தொலைபேசி மூலம் தொடர்புகொண்டாலும் நேரில் சந்திக்கும் வாய்ப்பு கிடைக்கவில்லை.

திரு G.M.B அவர்கள் வீட்டிலிருந்து திரும்பும்போது திரு ஜீவி அவர்களோடு ஒன்றாக பயணித்தபோது இருவரும் பல கருத்துகளை பரிமாறிக்கொண்டோம். ஒரு பெரிய எழுத்தாளரோடு நட்பு ஏற்பட்டது குறித்து எனக்கு மிக்க மகிழ்ச்சியே. இரண்டு நாட்களுக்கு முன் அவரோடு தொலைபேசியில் பேசிக்கொண்டு இருந்தபோது Pustaka.com இல் உறுப்பினராகி மின்னூல்களை வாங்கியும் படிக்கலாம் இல்லையெனில் அவர்கள் வைத்திருக்கும் மாதாந்திர, கால் ஆண்டு, அரை ஆண்டு ஆண்டு திட்டங்களில் பணம் கட்டி மின்னூல்களை தரவிறக்கம் செய்தும் படிக்கலாம் என்றும் சொன்னார்.

நானும் உடனே Pustaka.com இன் மாதாந்திர திட்டத்தில் 99 ரூபாய் செலுத்தி சேர்ந்துவிட்டேன். இந்த திட்டத்தின் படி 30 நாட்களில் கணக்கற்ற நூல்களை வாடகைக்கு எடுத்து படிக்கலாம். நாம் விரும்பும் நூல்களை தேர்வு செய்தால் அது நமது நூல்அடுக்கத்திற்கு (Book Shelf) வந்துவிடும். நாம் விரும்பும்போது படித்துக்கொள்ளலாம்.

நானும் முதலில் திரு ஜீவி மற்றும் திரு வை.கோ ஆகியோருடைய நூல்களில் 10 நூல்களை தரவிறக்கம் செய்து வைத்துவிட்டு முதலில்திரு ஜீவி அவர்களின் குமுதமும் விகடனும் என்ற சிறுகதைகள் தொகுப்பை எடுத்து படிக்க ஆரம்பித்தேன்.

குமுதமும் விகடனும் – சிறுகதைத் தொகுப்பு 1 பற்றிய எனது கருத்தை பகிர்ந்துகொள்ள விரும்புகிறேன்.

இந்த தொகுப்பில் மொத்தம் 11 கதைகள் உள்ளன. இவை பத்தோடு பதினொன்று அல்ல. அத்தனையும் முத்துக்கள்! ஒரு எழுத்தாளன் தன்னை சுற்றி நடக்கின்ற நிகழ்வுகளை கூர்ந்து கவனித்து, அவைகளுக்கு ஒரு உரு கொடுத்து இயல்பான நடையில் கதையாக வாசகர்களுக்கு படைக்கும்போது, அவைகளை படிக்கும் வாசகர்கள் தாங்களும் அந்த கதை நடக்கும் இடத்தில் இருப்பதுபோல் உணர்ந்தால் அதுவே அந்த எழுத்தாளனுக்கு கிடைக்கும் வெற்றி.

அந்த வகையில் திரு ஜீவி அவர்கள் வாசகர்களை தன் வயப்படுத்தி வெற்றி பெற்றுவிட்டார் என்றே சொல்வேன். ஒவ்வொரு கதையையும் படிக்கும்போது நாமே அந்த கதையில் வரும் கதாபாத்திரங்களை நேரில் பார்த்தது போலவும் அதில் நடக்கும் நிகழ்வுகளில் பங்கேற்றது போலவும் உணரமுடிகிறது. திரு ஜீவி அவர்கள் சிறுகதைகளில் தனது முத்திரையை பதித்துவிட்டார் என்பதற்கான சான்று இது.

இனி கதைக்குள் நுழைவோம். அனைவரும் மின்னூலை வாங்கியோ அல்லது வாடகைக்கு எடுத்து படிக்கவேண்டும் என்பதற்காக கதைகள் பற்றி ஓரிரு வரிகளில் எனது கருத்தை தந்துள்ளேன்.

1.சங்கிலி

நம்பி என்கிற ஒரு ஸ்கூட்டர் மெக்கானிக் கதாசிரியரிடம் பழுது நீக்க அதிக தொகையை வாங்கிவிட்டு பின்னர் அந்த மெக்கானிக் ஒரு மருத்துவரிடம் மருத்துவ செலவுக்கு அதிக பணம் தந்த அனுபவத்தை சுவைபடத் தந்திருக்கிறார். கடைசியில் அநியாய இழப்புகளுக்கும் அல்லது வரவுகளுக்கும் ஏதோ சங்கிலித் தொடர்பு இருக்கிறதோ எனக் கேட்டுவிட்டு முடிக்கிறார்

2.புதுமைப் பெண்களடி

சிகரெட் குடிக்கும் பழக்கம் உள்ள கணவனை கல்யாணம் ஆகி நாலு நாட்களில் திருத்திய மனைவியைப்பற்றிய கதை இது. இதில் அந்த இளம் மனைவி நடத்திய நாடகம் ஒரு பெண் நினைத்தால் எதையும் சாதிக்கலாம் என்று சிந்திக்க வைக்கிறது.

3.நான் சினிமாவுக்கு வரலே!..

ஒரு திரைப்பட விளம்பர சுவரொட்டியில் தெரிந்த கதாநாயகனின் கோலம் அருவருப்பைத் தர, அந்த படத்திற்கு அம்மா அழைத்தபோது போகாமல் தவிர்க்கும் கல்லூரியில் படிக்கும் பெண் கதா பாத்திரத்தின் மூலம், இன்றைய இளந் தலைமுறையினர் நம்மில் சிலர் நினைப்பது போல் விவரம் தெரியாதவர்கள் அல்ல. நம்மை விட விவரமானவர்கள் என்று கோடிட்டு காட்டுகிறார் திரு ஜீவி.

4. நீர் மோர்

இருபது ஆண்டுகளுக்கு முன் தனது நண்பனை ஒரு திடீர் விபத்தில் பறி கொடுத்த ஒருவர், அந்த நண்பன் போன்ற சாயலில் இருக்கும் ஒரு கை ரேகை பார்க்கும் இளைஞனைப் பார்த்து அவரிடம் கையை காட்டிவிட்டு அவருக்கு எவ்வளவு தர வேண்டும் எனக் கேட்டபோது அவர் சொன்ன பதிலால் அவருக்கு ஏற்பட்ட எதிர்பாரா அதிர்ச்சியே இந்த கதைக்கான கரு.

5.இந்த கதை அவளுடன் பேசட்டும்

இளம் விதைவையான ஒரு பள்ளி ஆசிரியை தன்னுடன் பணிபுரியும் இன்னொரு ஆசிரியரின் காதலியோடு சேர்த்து வைப்பதற்காக ஒரு கற்பனை நிகழ்வை கதைபோல் எழுதி ஒரு பத்திரிகைக்கு அனுப்ப அது பிரசுரமாகும்போது அவர் நினைத்தது நடந்ததா என்று ஆவலுடன் படிப்போருக்கு எதிர்பாரா முடிவைத் தரும் கதை இது

6.மதிப்பீடுகள்

ஒரு தச்சு வேலை செய்பவரிடம் ஒரு நடுத்தர குடும்பத்தினர் ஒரு வேலை செய்ய முன் பணம் கொடுத்து விட்டு அவர் சொன்ன நேரத்திற்கு வராதபோது அவரைப்பற்றி என்ன நினைக்கிறார்கள் என்ற கதை மூலம் நாம் ஒவ்வொருவரும் மற்றவர்கள் பற்றி அறியாமல் அவர்களை எப்படி தவறாக மதிப்பீடு செய்கிறோம் என்பதை சொல்லியிருக்கிறார் திரு ஜீ வி அவர்கள்.

7.இன்று செருப்பு நாளை சேலை

குமுதம் இதழில் வெளியான இந்த கதையை திரு ஜீ.வி அவர்கள் தனது ‘பூ வனம்’ வலைத்தளத்திலும் சென்ற ஆண்டு டிசம்பரில் வெளியிட்டிருந்தார். மற்றவர்களின் உண்மை நிலை தெரியாமல் தவறாக எண்ணி, பின்னர் திருந்தும் ஒரு சராசரி மனிதனின் கதை இது.

8.நான் குப்புசாமி இல்லை.

வெளி நாட்டிலிருந்து வந்திருக்கும் பெயரன் ஒருவன் எப்படி நாம் நடந்துகொள்ளவேண்டும் என்பதை சொல்லி தன் தாத்தாவை திருத்தியது போல் அமைந்த ஒரு மாறுபட்ட கதை இது. இதைப் படித்தால் புரியும் நாம் குப்புசாமியா இல்லையா என்று!

9.செய்தி

இந்த கதையையும் திரு ஜீ.வி அவர்கள் தனது ‘பூ வனம்’ வலைத்தளத்தில் இந்த ஆண்டு பிப்ரவரியில் வெளியிட்டிருந்தார். நம்மில் பலர் வேற்று மொழிச்சொல்லை குறிப்பாக வடமொழிச்சொல்லை பயன்படுத்த விரும்பாமல் அதை தமிழ்ப்படுத்துவதாக நினைத்துக்கொண்டு தமிழில் அதற்கான மாற்றுச் சொல் இருந்தும் தவறாக எழுதுவதை ஒரு குடும்பத்தினர் உரையாடலில் இயல்பாக இணைத்து தந்திருக்கிறார்.

10. அனந்த குமாரும் ஆனந்த குமாரும்

ஒரு திரைப்படக் கவிஞர் தனது உதவியாளரை சபையோர் முன் தான் எழுதியதை தன் உதவியாளர் எழுதியது என சொல்லி கௌரவப்படுத்துகிறார் என்று சொல்லி, இதுபோன்ற தனது உதவியாளர்களை கைதூக்கிவிடும் கவிஞர்கள் இருக்கவேண்டும் என்பதை சொல்லாமல் சொல்லும் கதை இது. கதையில் வரும் கவிஞர் மற்றும் அவரது உதவியாளர் ஆகியோரின் பெயர்கள் ஓரெழுத்தை தவிர்த்து ஒன்றுபோல் இருப்பதால் சில இடங்களில் குழப்பம் வருகிறது.

11.குமுதமும் விகடனும்

தொகுப்பின் தலைப்பைக்கொண்ட இந்த கதையில் வரும் கதா பாத்திரங்களான மணமுறிவு ஏற்பட்ட கணவனும் மனைவியும் எப்படி தங்களின் குழந்தையின் உடல் நிலை காரணமாக உணர்ச்சிபூர்வமாக இணைந்தார்கள் என்பதை வெகு நேர்த்தியாக சொல்லியிருக்கிறார் திரு ஜீவி அவர்கள். உண்மையில் நம் வீட்டில் நாமும் இந்த குமுதம் விகடன் தம்பதியர் போலத்தான் என்பதையும், விட்டுக்கொடுப்பதே வாழ்க்கை என்பதையும் வெகு எளிதாக புரியவைத்துவிட்டார் திரு ஜீ வி அவர்கள்.

எல்லாக் கதைகளுக்கும் சிகரமான இதை கடைசியில் வைத்திருப்பதன் காரணம் புரியவில்லை.

சொன்னால் நம்பமாட்டீர்கள். இரண்டு மணி நேரத்தில் தொகுப்பில் இருந்த கதைகள் அனைத்தையும் ஒரே மூச்சில் படித்துவிட்டேன் என்பதிலிருந்தே கதைகள் எந்த அளவுக்கு வாசகர்களை ஈர்க்கும் விதத்தில் எழுதப்பட்டிருக்கிறது என்பதை புரிந்துகொள்ளலாம்.

திரு ஜீவி அவர்களின் மற்ற கதைகளையும் படிப்பேன். எனது கருத்தையும் தெரிவிப்பேன்

பி.கு இந்த கதை தொகுப்பு பற்றி எழுதிக்கொண்டு இருக்கும்போது எனக்கு Pustaka விலிருந்து ஒரு மின்னஞ்சல் வந்தது. அதில் திரு ஜீவி அவர்கள் தனது படைப்புகளான ‘இருட்டுக்கு இடமில்லை’ பார்த்தவை படித்தவை ஆகிய இரண்டு மின் நூல்களை பரிசளித்திருப்பதாக சொல்லப்பட்டிருந்தது. நானும் Pustaka.com சென்று எனது நூல் அடுக்கத்தை பார்த்தபோது அதில் Author Gifted Books என்ற தலைப்பின் கீழ் அவைகள் இடம் பெற்ருந்தன.

நன்றி திரு ஜீவி சார்!