மொழிபெயர்ப்புக் க(கொ)லை! 2

முந்தைய பதிவில், தமிழில் மொழிபெயர்க்கப்பட்டிருந்த பொருளாதார பாடத்தில், குறிப்பிட்டிருந்த ‘விலைவாசியைக் குறைக்க அரசிடம் விளயாட ஒரு பெரிய உருளை உள்ளது!’ என்ற சொற்றொடரை தந்திருந்தேன்.

அதனுடைய  ஆங்கில மூலம் என்னவாக இருக்கும் என்று  யூகிக்கமுடிந்தவர்கள், அதை பின்னூட்டத்தில் வெளியிடலாம் என்றும், அது என்பதை  அடுத்த பதிவில் சொல்வதாகவும் சொல்லியிருந்தேன்.

நண்பர்கள் நான்கு பேர் முயற்சித்து விடை தந்திருந்தாலும், கனடாவில் வசிக்கும் திரு ராஜ் சந்திரசேகரன் அவர்களும்,  திரு வெங்கடாசலம் அவர்களும்  சரியான பதிலை தந்திருந்தார்கள்.ஆனால் இருவரில் திரு ராஜ் சந்திரசேகரன் அவர்களே துல்லியமான விடையைத் தந்திருந்தார். இருவருக்கும் வாழ்த்துகள்!

‘விலைவாசியைக் குறைக்க அரசிடம் விளயாட ஒரு பெரிய உருளை உள்ளது!’ என்ற சொற்றொடரின் ஆங்கில மூலம் இதுதான். The government has a "big role to play" in reducing the prices.

நான் முன்பே சொல்லியிருந்தபடி பாட நூல்களை மொழிபெயர்ப்போர் அவசியம் அந்த பாடம் பற்றி அறிந்தவராக இருக்கவேண்டும். மேலும் தாங்கள் மொழிபெயர்க்கும் மொழியையும், தங்களது மொழியையும் நன்றாக அறிந்தவராக இருக்கவேண்டும்.

மேலே குறிப்பிட்டுள்ளதை மொழிபெயர்த்தவர் துரதிர்ஷ்டவசமாக பொருளாதார பாடம் அறிந்தவராக தெரியவில்லை. மேலும் ஆங்கில மொழியையும் நன்றாக கற்றுத் தேர்ந்தவராகவும் தெரியவில்லை. அதனால்தான்  Role மற்றும் Roll என்ற ஆங்கில சொற்களுக்கிடையே உள்ள வேறுபாடு தெரியாமல் Role என்பதை உருளை என்று மொழிபெயர்த்திருக்கிறார்.

Friendship என்பதை நண்பன் கப்பல் என அபத்தமாக மொழிபெயர்ப்பதுபோல், பொருளாதார பாடத்தை மொழிபெயர்த்தவர் வரிக்கு வரி நேரடியான பொருளை தந்து படிப்பவர்களையும், பாடம் நடத்துபவர்களையும் குழப்பியிருக்கிறார். இன்னும் இதுபோல் எத்தனை நகைப்புக்குரிய மொழிபெயர்ப்புகள் அந்த பாட நூலில் இருந்தது எனத் தெரியவில்லை.

முன்பெல்லாம் பள்ளியிறுதி ஆண்டு வகுப்பு  (S.S.L.C) மற்றும் புகுமுக வகுப்புகளில் தமிழ் பாடத்துடன் மொழிபெயர்ப்பு பாடமும் உண்டு. அதற்காக தனியாக தேர்வும் உண்டு. தேர்வில் ஆங்கில மூலத்தில் ஒரு பத்தி (Paragraph) யை கொடுத்து அதை தமிழிலும், தமிழில் ஒரு பத்தியைக் கொடுத்து அதை ஆங்கிலத்திலும் மொழிபெயர்க்க சொல்வார்கள். இப்போது அதுபோல் உள்ளதா எனத் தெரியவில்லை. 

மொழிபெயர்ப்புக்கு பயிற்சி மட்டும் போதாது. மூல மொழி, பெயர்ப்பு மொழி ஆகிய இரண்டிலும் ஆழ்ந்த அறிவோடு அதில்  ஈடுபாடும் இருக்கவேண்டும்.

கலை இலக்கிய நூல்களை மொழிபெயர்ப்பதற்கும் அறிவியல் நூல்களை மொழிபெயர்ப்பதற்கு வேறுபாடு உண்டு. முன்னதில் மொழிபெயர்க்கும் மொழியில் உள்ள சொற்களுக்கு மாற்றாக மொழிபெயர்க்கப்படும் மொழியில் இணையான சொற்களை தந்தால் மட்டும் போதாது. மூலத்தில் உள்ள கருத்தை  உள்வாங்கி, மொழிபெயர்க்கும் மொழியில் வாசகர்களுக்கு புரியும் வகையிலும் சுவாரஸ்யமாகவும் தரவேண்டும். அதனால் மொழிபெயர்ப்பை மொழியாக்கம் என்று சொல்வதுண்டு.

அந்தவகையில் தமிழில் வேற்றுமொழி கதைகளை இலக்கியங்களை சிறப்பாக மொழிபெயர்த்து மூல நூலை படிப்பது போன்ற உணர்வை ஏற்படுத்தியவர்கள் பலர் உண்டு. இன்னும் சொல்லப்போனால் மொழிபெயர்த்தவர் பெயரைவிட, மூல ஆசிரியரின் பெயரே தமிழ் வாசகர்களுக்கு நெருக்கமாக இருந்தது உண்மை.  

மகாராஷ்டிரத்தைச் சேர்ந்த புகழ்பெற்ற மராத்திய எழுத்தாளரும் ஞானபீட விருததை பெற்ற முதல் மராட்டிய எழுத்தாளருமான  திரு வி. எஸ். காண்டேகரின் (Vishnu Sakharam Khandekar) நூற்றுக்கும் மேற்பட்ட சிறுகதைகள் மற்றும் நாவல்களை தமிழில் மொழிபெயர்த்தார்  திரு. காஞ்சீபுரம் ஸ்ரீரங்காச்சாரியார் ஸ்ரீநிவாச்சாரியார்  என்கிற கா.ஸ்ரீ.ஸ்ரீ.

திரு கா.ஸ்ரீ.ஸ்ரீ யால் மொழிபெயர்க்கப்பட்ட காண்டேகரின் படைப்புகள் காண்டேகரே தமிழில் எழுதியது போல் இருந்ததால், திரு கா.ஸ்ரீ.ஸ்ரீ தமிழ் காண்டேகர் என அழைக்கப்பட்டார்.

திரு காண்டேகரின் ‘கிரௌஞ்ச வதம்’ நாவல் தொடராக ‘கலைமகள்’ இதழில் வந்தபோது வாசகர்கள் அனைவரும் ஒவ்வொரு மாதமும் அதைப் படிக்க ஆவலுடன் காத்திருந்ததே அந்த நாவலின் தரமான மொழிபெயர்ப்புக்கு கிடைத்த வெற்றி.

தொடரும்