Boss கள் பலவிதம்! 37

அனுபவம் ஒரு பாடம் என்பார்கள்.அது உண்மைதான். நான் பணி புரிந்தபோது எனக்கு Boss ஆக இருந்தவர்களிடமிருந்து நான் கற்றுக்கொண்ட பாடங்கள் ஏராளம்.அவர்களுக்கு கீழே பணி 

ஆற்றியபோது ஒரு Boss எப்படி இருக்கவேண்டும் என்பதை விட, ஒரு Boss எப்படி இருக்கக்கூடாது என்பதையே  கற்றுக்கொண்டேன்.

எங்கள் வங்கியின் பயிற்சி கல்லூரியில் சொல்வார்கள். ‘எதை கற்றுக்கொள்ளக்கூடாது என்பதை முதலில் கற்றுக்கொள்ளுங்கள்.’

என்று.

அந்த அறிவுரையை நான் முழுமையாக ஏற்றுக்கொண்டேன். நான் 

முதன் முதல் வங்கியில் கிளை மேலாளராக ஆனது 1983 மே மாதத்தில் தான்.அதிலிருந்து  21 ஆண்டுகள் நான் பலருக்கு Boss ஆக

இருந்திருக்கிறேன்.ஆனால்  Boss ஆக இல்லாமல், ஒரு மூத்த சக 

ஊழியர்போல, ஒரு நல்ல நண்பன் போலவே நடந்துகொண்டேன் என்பதைஎன்னுடன் பணியாற்றிய நண்பர்கள் ஒத்துக்கொள்வார்கள்.

மாநில அரசில் எனக்கு கிடைத்த அனுபவமும், வங்கியில் சேர்ந்தவுடன்

கிடைத்த அனுபவமும் ஒரு Boss எப்படி இருக்கக்கூடாது என்பதையும், தார்வாரில் திரு மோகன் அவர்கள் கீழ் பணியாற்றிய அனுபவத்தால் 

ஒரு Boss எப்படி இருக்கலாம்/இருக்கவேண்டும் என்பதையும் கற்றுக்கொண்டேன்.

நான் முதன்முதல் மன்னார்குடியில் மாவட்ட வேளாண் அலுவலரைப் பார்க்கப் போனபோது ஏற்பட்ட கசப்பான அனுபவம் அப்படியே மறையாமல் மனதில்  இருந்ததால், அது போன்ற நிகழ்வுகள் என்னுடன் பணியாற்றுபவர்களுக்கு ஏற்படக்கூடாது என்பதில் உறுதியாய் இருந்தேன்.

அண்ணாமலைப் பல்கலைக் கழகத்தில் படிக்கும்போது, நான் பார்த்த ‘தெய்வத்தாய்’ என்ற திரைப்படத்தில் கவிஞர் வாலி அவர்களால்

எழுதப்பட்டு திரு T.M.சௌந்தரராஜன் அவர்கள் பாடிய

‘’பதவி வரும்போது பணிவு வரவேண்டும்

துணிவும் வரவேண்டும் தோழா

பாதை தவறாமல் பண்பு குறையாமல்

பழகி வரவேண்டும் தோழா’’

என்ற வரிகள் என் மனதில் பசு மரத்தாணி போல் பதிந்து விட்டதால்,

பதவி வந்தபோது பணிவோடு  இருந்தேன் என்பதுதான்  உண்மை.

வங்கியில் முதன் முதல் மேலாளராக ஆன போது எப்படி நடந்து கொள்ளவேண்டும் என எனக்கென்று நானே சில கொள்கைகளை ஏற்படுத்திக்கொண்டு அவைகளை கடைப்பிடிக்க ஆரம்பித்தேன்.

நேரம் தவறாமை, முன் மாதிரியாக நடந்துகொள்ளுதல், நடு நிலைமையோடு இருத்தல்,சக ஊழியர்களை மதிப்போடு நடத்துதல், வங்கிக்கு விசுவாசமாய் இருப்பதோடு நேர்மையாய் இருத்தல், வெளிப்படையான செய்கைகள் போன்றவைகள்தான் அவைகள்.

அவைகளை நான் பணி ஓய்வு பெறும் வரை கடைப்பிடித்தேன் என்பதை பெருமையோடு சொல்லிக்கொள்ளுவேன்..

வங்கியில் மேலாளாராகவும் மற்றும் அதற்கு மேல் உள்ள பதவிகளை 

வகித்தபோது என்னைப்பார்க்க வருகின்ற சக ஊழியர்களை எனது

முன்னால் உள்ள நாற்காலியில் அமர சொல்லிவிட்டு தான் அவர்களை 

மேலே பேச சொல்வேன்.

அதுவும் எனது கிளைக்கு மாற்றலாகி சேர வருபவர்களை முதலில்

உட்கார சொல்லி அவர்களுக்கு காஃபி வரவழைத்துக் கொடுத்து, அவர்களைப் பற்றி விசாரித்து,பின் சார்பு மேலாளரை (Sub Manager) அழைத்து அவர்களை கிளையில் உள்ள அனைவருக்கும் 

அறிமுகப்படுத்த சொல்வது என் வழக்கம்.இவ்வாறு செய்வது மூலம் அவர்களுக்கு  புதிய இடத்தில் ஏற்படும் தயக்கம் போகும் என்பது 

எனது கணிப்பு.

எங்கள் வங்கி கிளைகளில் ஒவ்வொரு ஊழியருக்குமான கோப்புகள்

(Staff Files) மேலாளர் வசம் தான் இருக்கும்.அதில் அந்த ஊழியர் 

சேர்ந்தது முதல் பணியாற்றிய கிளைகளில் அவருக்கு தரப்பட்ட கடிதங்களின் நகல்கள் அனைத்தும் கோர்த்து வைக்கப்பட்டிருக்கும்.

ஒருவேளை அவர் ஏதாவது தவறு செய்து அதற்காக அவரிடம் 

விளக்கம் கேட்டிருந்தாலோ அல்லது அவருக்கு குற்ற அறிக்கை 

(Charge Sheet) கொடுக்கப்பட்டு இருந்தாலோ விசாரணை நடத்தி பின் அவருக்கு தண்டனை கொடுக்கப்பட்டு இருந்தாலோ அந்த ஆவணங்கள் அனைத்தும் அவரது கோப்பில் இருக்கும். கிளைக்கு  மாற்றலாகி 

வரும் ஊழியர்களின் கோப்பு வந்தவுடன் சிலர் அதைப் புரட்டிப் பார்த்து அவர் மேல் ஏதேனும் குற்ற அறிக்கை(Charge Sheet) கொடுக்கப்பட்டு இருக்கிறதா எனப் பார்ப்பது வழக்கம்.

ஆனால் நான் ஒருபோதும் அந்த கோப்புகளின் உள்ளே சென்று படித்ததில்லை. ஒரு ஊழியர் தவறு செய்ததாக தண்டிக்கப்பட்டு 

இருந்தால் அதற்கு பல காரணங்கள்  இருக்கக்கூடும்.ஒருவேளை 

அவர் தவறாக தண்டிக்கப்பட்டு இருக்கலாம் அல்லது சூழ்நிலையின் காரணமாக  அவர் தவறு செய்து, அதனால் தண்டிக்கப்பட்டு பிறகு 

திருந்தி இருக்கலாம்.

எனவே அவைகளைப் படித்து அவர் எங்கோ எப்போதோ செய்த ‘தவறு’க்குக்காக, என் கீழ் பணியாற்றும் போதும் திரும்பவும் தவறு செய்யக்கூடியவர் என்ற தவறான எண்ணத்தை ஏற்படுத்திக்கொண்டால் அவரது செய்கைகள் யாவும் தவறாகவே தோன்றும் அது அவருக்கும் நல்லதல்ல, கிளையின் வளர்ச்சிக்கும் நல்லதல்ல என்பதால் நான் 

அந்த கோப்புகள் அஞ்சல் மூலம் வந்ததும் அப்படியே உள்ளே வைத்துவிடுவேன்.

எனது இந்த பழக்கத்தால் வங்கியால் தொல்லை கொடுப்பவர்கள்

(Trouble Makers) என கருதப்பட்டவர்கள் என்னிடம் வந்ததும்

Trouble Shooters கள் ஆனார்கள் என்பது உண்மை. இதனாலேயே எனது

வட்டார அலுவலகம் சிலரை எனது கிளைக்கு மாற்றிவிட்டு  என்னை தொலைபேசி மூலம் கூப்பிட்டு, ‘உங்களிடம் வந்தால் இவர்

மாறிவிடுவார்  என்றே அனுப்பியிருக்கிறோம்.’ என்று சொன்னதும்

உண்டு.

நான் கண்டிப்பாக இருந்திருக்கிறேன் ஆனால் அதே நேரம் கனிவாகவும் இருந்திருக்கிருக்கிறேன். என் கீழ் பணியாற்றியவர்களுக்காக எனக்கு மேல் உள்ள அதிகாரிகளிடம் எடுத்து சொல்லி அவர்களுக்கு பதவி உயர்வு பெற்று தந்திருக்கிறேன்.

தொடரும்